کوئٹہ(این این آئی) سکیورٹی فورسز نے افغان سر زمین سے پاکستان میں دہشتگردی کی ایک اور سازش ناکام بناتے ہوئے پاک افغان سرحد پر چمن کے مقام سے بارود سے بھری ہوئی ایک گاڑی پکڑلی۔میڈیا رپورٹ کے مطابق ایک عہدیدار نے نام ظاہر نہ کرنے کی شرط پر بتایا کہ سکیورٹی فورسز نے پاک افغان سرحد کے قریب کارروائی کی اور بارود سے بھری گاڑی پکڑنے کے ساتھ ساتھ ایک ملزم کو بھی گرفتار کرلیا جسے
مزید تفتیش کے لیے نامعلوم مقام پر منتقل کردیا گیا۔مذکورہ عہدیدار کے مطابق دہشتگرد کوئٹہ میں تخریب کاری کرنا چاہتے تھے تاہم بروقت کارروائی سے اسے ناکام بنا دیا گیا۔انہوں نے بتایا کہ دھماکا خیز مواد کو تلف کرنے کے لیے بم ڈسپوزل اسکواڈ کو طلب کیا گیا۔مذکورہ عہدیدار کے مطابق اس حوالے سے مزید تفتیش جاری ہے، تاہم انہوں نے گرفتار ملزم کے حوالے سے مزید تفصیلات فراہم نہیں کیں۔واضح رہے کہ پاک افغان سرحد کے اطراف سکیورٹی انتہائی سخت کردی گئی ہے تاکہ پڑوسی ملک افغانستان سے دہشتگردوں کی آمدورفت کو روکا جاسکے۔
