لاہور ( این این آئی) پنجاب فوڈ اتھارٹی کی ٹیموں نے مری میں ناقص صفائی پر ایک ریستوران اور فیصل آباد میں چائے کی پتی کے2 یونٹ سیل کردیئے۔پنجاب فوڈ اتھارٹی کی ٹیموں کے ناقص اور غیرمعیاری اشیائے خورد ونوش تیار کرنے والے ہوٹلوں اور اداروں کے خلاف چھاپوں کا سلسلہ جاری ہے، فیصل آباد میں پنجاب فوڈ اتھارٹی کی ٹیم نے چائے کی پتی تیار کرنے والے 2 یونٹ سیل کرکے 25 سو کلو پتی قبضے میں لے لی۔ان یونٹوں پر چائے کی پتی میں ملاوٹ کی جا رہی تھی، نمونے ٹیسٹ کے لئے لیبارٹری بھجوا دیئے گئے ہیں۔پنجاب فوڈ اتھارٹی کی دوسری ٹیم نے مری میں تھالی ریستوران کو سیل کر دیا، ڈپٹی ڈائریکٹر فریحہ انورکے مطابق ریستوران میں کھانے پینے کی اشیاء غیر معیاری پائی گئیں جبکہ صفائی ستھرائی کا معیار بھی درست نہ تھا۔