میانوالی (این این آئی)فیصل آباد الیکٹرک سپلائی کمپنی (فیسکو)نے 200 یونٹ تک بجلی استعمال کرنے والے پروٹیکٹڈ صارفین کو خبردار کیا ہے کہ

حکومتی سبسڈی برقرار رکھنے کیلئے لازمی کیو آر کوڈ ویری فکیشن فوری مکمل کریں، بصورت دیگر سبسڈی سے محروم ہو سکتے ہیںتفصیلات کے مطابق وفاقی وزیر برائے توانائی سردار اویس احمد خان لغاری کی خصوصی ہدایات اور چیف ایگزیکٹو آفیسر فیسکو انجینئر محمد عامر کے احکامات پر فیصل آباد الیکٹرک سپلائی کمپنی (فیسکو) نے بجلی کے بلوں پر کیو آر کوڈ اسکیننگ کے ذریعے صارفین کی تصدیق اور رجسٹریشن مہم کو مزید تیز کر دیا، اس اقدام کا مقصد مستحق صارفین کو کراس سبسڈی کی بلا تعطل فراہمی اور پورے نظام کو ڈیجیٹل و محفوظ بنانا ہے،

فیسکو کے ترجمان محمد سعید رضا نے رجسٹریشن کے حوالے سے بتایا کہ فیسکو ریجن میں حکومتی سبسڈی کے اہل پروٹیکٹڈ صارفین کی مجموعی تعداد 39 لاکھ 51 ہزار 336 ہے اور اب تک 17 لاکھ 13 ہزار 110 صارفین اپنے بجلی کے بلوں پر موجود کیو آر کوڈ اسکین کر کے کامیابی سے رجسٹرڈ ہو چکے ہیں، ترجمان کے مطابق ریجن کے 22 لاکھ 38 ہزار 126 صارفین ایسے ہیں جنہوں نے ابھی تک تصدیقی عمل مکمل نہیں کیا، جس کے باعث مستقبل میں ان کی حکومتی سبسڈی رکنے یا مشکلات پیش آنے کا سنگین خطرہ ہے۔