ریاض(این این آئی) سعودی پولیس نے ایک نوجوان خاتون کو عبایہ اتارنے پر حراست میں لے لیا۔مقامی میڈیا کے مطابق نوجوان خاتون کو اْس وقت حراست میں لیا گیا جب پولیس کے پاس اس حوالے سے شکایت درج کروائی گئی۔ ریاض پولیس کے ترجمان کرنل فواض المیمان نے بتایا کہ پولیس نے ایک نوجوان خاتون کو التہلیہ اسٹریٹ سے اْس وقت گرفتار کیا، جب انھوں نے اپنا عبایہ اتارا، جس کا کچھ دن قبل انھوں نے سوشل میڈیا پر اعلان کیا تھا۔دوسری جانب ایک اور ویب سائٹ کا کہنا تھا کہ ایک نامعلوم خاتون نے سماجی رابطے کی ویب سائٹ ٹوئٹر پر پوسٹ کیا تھا کہ وہ عوامی مقامات پر عبایہ کے بغیر جائیں گی۔

دیگر ویب سائٹس نے ایک نوجوان خاتون کی تصویر شیئر کی، جس میں انھیں سیاہ جیکٹ اور ٹخنوں تک آتے نارنجی اور گلابی لباس میں دیکھا جاسکتا ہے۔اس تصویر پر سعودی شہریوں کی جانب سے سخت ناراضگی اور غم و غصے کا اظہار کیا گیا۔ایک ٹوئٹر صارف کا کہنا تھاکہ تون کو گرفتار کرلیا گیا ہے اور ہم ریاستی قوانین کا احترام نہ کرنے پر سخت سزا کا مطالبہ کرتے ہیں۔واضح رہے کہ سعودی عرب میں خواتین کے لیے عبایہ پہننا لازمی ہے، جبکہ انھیں مخلوط محفلوں میں شرکت اور ڈرائیونگ کی بھی اجازت نہیں ہے۔