اسلام آباد(مانیٹرنگ ڈیسک)حویلیاں طیارہ حادثے میں شہید ہونے والے جنیدجمشید 3ستمبر 1964 کوکراچی میں پیدا ہوئے جہاں سے انہوں نے ابتدائی تعلیم حاصل کی جس کے بعد وہ لاہور آگئے اور یونیورسٹی آف انجینئرنگ اینڈ ٹیکنالوجی سے ڈگری حاصل کی،وہ کچھ عرصہ پاکستان ایئرفورس میں بھی کام کرتے رہے۔جنید جمشید نے اپنی زندگی میں 13 بار حج بیت اللہ کی سعادت حاصل کی تھی۔

دوران تعلیم ہی انہیں میوزک کا شوق پیداہوا اور انہوں چنددوستوں کے ہمراہ مل کر گلوکاری شروع کردی جس کے بعد انہوں نے1986میں اپنے دوست کیبورڈ پلیئر روحیل حیات سے مل کر میوزیکل بینڈ’’وائٹل سائنز‘‘کی بنیاد رکھی اور اسی دوران پی ٹی وی کے پروڈیوسر شعیب منصور نے ان سے رابطہ کیا اور ان کے پہلے البم’’وائٹل سائنز‘‘کے میوزک کی تیاری میں ان کی معاونت کی۔جنید جمشید کے پہلے البم کے ویسے تو سارے ہی گانے مشہور ہوئے کیونکہ اس زمانے میں پاکستان میں پاپ میوزک کافی مقبول تھا لیکن ایک ملی نغمہ جس نے دھوم مچادی وہ تھا’’دل دل پاکستان‘‘۔اس کے بعد جنید جمشید گلوکاری چھوڑ کر دین کی راہ پر چل پڑے اور مبلغ اور نعت خواں بن گئے تھے۔ جنید جمشید کے دوستوں کے مطابق وہ جب بھی نعت پڑھا کرتے تھے تو ان پر رقت طاری ہو جاتی تھی۔