کراچی (این این آئی ) گورنر خیبرپختونخوا ظفر اقبال جھگڑا نے کہا ہے کہ پاناما لیکس کو پوری قوم نے دیکھ لیا ہے جبکہ سپریم کورٹ کی رولنگ بھی آ گئی ہے ۔ جن لوگوں نے الزام لگائے تھے ، وہ موجود نہیں تھے ۔ نواز شریف کا تیسری بار وزیر اعظم بننا کوئی اتفاق نہیں ہے بلکہ پاکستان کی پالیسی اور قومی اعتماد کا مظہر ہے ۔
اپوزیشن کو قوم کے بہتر مفاد کے لیے مثبت کردار ادا کرنا چاہئے ۔ ان خیالات کا اظہار انہوں نے بدھ کو کراچی ایکسپو سینٹر کے دورے کے موقع پر میڈیا سے بات چیت کرتے ہوئے کیا ۔ انہوں نے کہا کہ ماضی کی نسبت خیرپختونخوا میں امن وامان کی صورت حال بہت بہتر ہے ، جس کا تمام تر کریڈٹ پاک فوج کو جاتا ہے ۔
انہوں نے کہا کہ عمران خان اپوزیشن کا کردار اسمبلی پلیٹ فارم پر ادا کریں ۔ ہم کسی الزام سے پیچھے ہٹنے والے نہیں ہیں ۔ انہوں نے کہاکہ پاکستان ساتویں ایٹمی قوت ہونے کے ناطے خطے میں پاکستان کی اپنی اہمیت ہے ۔ ظفر اقبال جھگڑا نے کہا کہ دفاعی نمائش سے 400 سے زائد کمپنیوں کی شرکت پاکستان پر اعتماد کا اظہار ہے ۔ آج کوئی ہمیں ڈکٹیشن دیتا ہے تو کل ہم بھی ڈکٹیشن دینے کے قابل ہو جائیں گے ۔ انہوں نے جنرل راحیل شریف کو خراج تحسین پیش کرتے ہوئے کہا کہ جنرل راحیل شریف کے باعث ضرب عضب کے ذریعہ ملک سے دہشت گردی کا خاتمہ ہوا ہے ۔
