اسلام آباد (مانیٹرنگ ڈیسک ) تحریک انصاف کا دھرنا جوں جوںقریب آتاجا رہاہے ویسے ویسے سیاسی ماحول میں ہلچل بڑھتی جا رہی ہے ۔ تازہ ترین تفصیلات کے مطابق پاکستان تحریک انصاف کے رہنما جہانگیر ترین کو گرفتار کر نے کیلئے پولیس کی بھاری نفری انکے گھر کے باہر پہنچ گئی ۔ تفصیلات کے مطابق سیکرٹری جنرل جہانگیر ترین کو گرفتار کر نے کیلئے اسلام آبا د پولیس کی بھاری نفری انکی رہائش گاہ کے باہر پہنچ گئی ہے ۔ ذرائع کا کہنا ہے کہ پانچ گاڑیوں میں پولیس کی بھاری نفری انکے گھر کے باہر موجود ہے جنہوں نے گھر کا گھیراؤ کر لیا ہے تاہم ابھی تک جہانگیر ترین کو گرفتار نہیں کیا جا سکا ۔ ذرائع کا کہنا ہے کہ جہانگیر ترین اس وقت اپنے گھر پر موجود نہیں ہیں ، وہ بنی گالہ میں جاری اجلاس میں شریک ہیں ۔