لاہور( این این آئی)پاکستان تحریک انصاف کے سربراہ عمران خان نے اسلام آباد کے احتجاج کی کال کو کامیاب بنانے کیلئے پنجاب کے ضلعی صدور کوٹاسک سونپ دیا ، ایک ہزار سے کم کارکنان لانے والے ضلعی صدر کیخلاف ایکشن لینے کا عندیہ دیدیا گیا ۔ذرائع کے مطابق پی ٹی آئی سربراہ نے وسطی پنجاب سے تعلق رکھنے والے عہدیداروں کے اجلاس میں رائے ونڈ جلسہ بھی زیر بحث آیا جس میں لاہور سے تعلق رکھنے والے رہنماؤں کی غلط حکمت عملی پر ان کی سرزنش کی گئی جبکہ شیخوپورہ، گوجرانوالہ ، سیالکوٹ کے کارکنان کوتیس ستمبر کا جلسہ کامیاب بنانے پرمبارکباد دی گئی ۔ذرائع کے مطابق عمران خان نے اپنے خطاب کے دوران عہدیداروں کو کہا کہ کشتیاں جلا کر اسلام آباد کا رخ کرنا ہوگا ۔ اسلام آباد کے احتجاج کی کال کو کامیاب بنانے کیلئے کارکنوں سے روزانہ کی بجائے ہر لمحے رابطے رکھے جائیں اور انہیں ملک کے مستقبل کے حوالے سے آگاہ کرتے ہوئے دھرنے میں شرکت کیلئے قائل کیا جائے۔ذرائع کے مطابق ملاقات میں عمران خان نے پنجاب کے ہر ضلعی صدر کو تاکید کی ہے کہ ہر ضلعی صدر ایک ہزار کارکنوں کو اسلام آباد دھرنے میں لانے کا پابند ہوگاجوضلعی صدر مطلوبہ کارکن لانے میں ناکام رہا جبکہ ناکامی کی صورت میں عہدیدار کے خلاف ایکشن کا عندیہ دیا گیا ہے۔

موضوعات:اسلام آباد دھرنا