کراچی(این این آئی)سندھ کے وزیر صنعت وتجارت منظورحسین وسان نے پیشگوئی کی ہے کہ مستقبل میں دبئی کے حالات خراب اور کراچی کے بہتر ہو جائیں گے ، صنعتکار اپنا سرمایہ واپس کراچی منتقل کریں،2018میں ہونے والے عام انتخابات میں پیپلزپارٹی، تحریک انصاف اورمسلم لیگ(ن)میں مقابلہ ہوگا،بلاول بھٹو زرداری بازی لے جائیں گے۔صوبائی وزیر صنعت و تجارت منظور وسان کی پیشگوئیوں کا سلسلہ جاری ہے ۔ منگل کوسائٹ زون میں صنعتکاروں اورمیڈیاسے بات چیت کرتے ہوئے منظوروسان نے پیشگوئی کی ہے کہ مستقبل میں کراچی کے حالات بہتر جبکہ دبئی کے خراب ہو جائیں گے اس لئے صنعتکار اپنا سرمایہ کراچی واپس منتقل کریں ۔انہوں نے کہاکہ ملک کی جغرافیائی سرحدوں پرحالات کشیدہ ہیں، پورا پاکستان امن کا خواہاں ہے، گزشتہ روزاجلاس میں عمران خان کی عدم شرکت درست عمل نہیں، احتساب سب کا ہوگا کوئی بھی غلط فہمی میں نہ رہے، سمجھ نہیں آتا کہ وزیراعظم پانامالیکس کے معاملے پر بات کرنا کیوں نہیں چاہتے۔ انہوں نے کہا کہ سندھ حکومت کی کوشش ہے صنعتکاروں کے مسائل فوری حل ہوں، تاجروں کی تجاویزپر2017 میں صنعتی زون میں تبدیلی آئے گی، سرمایہ کاری بڑھے گی، کوئی کراچی چھوڑکرباہرنہیں جائیگا۔منظور وسان نے انفراسٹرکچر سے متعلق صنعتکاروں کی شکایات سنی اور یہ خوشخبری سنائی کہ سائٹ زون میں تعمیراتی کام جون تک میں مکمل کرلیا جائے گا ۔ انہوں نے کہاکہ صنعتکاروں کے مسائل کو ترجیحی بنیادوں پر حل کیا جائے گا ۔ حکومت کے ساتھ ساتھ صنعتکار بھی انڈسٹریل ایریا میں صفائی ستھرائی کا خاص خیال رکھیں

موضوعات:دبئی کراچی