کراچی (مانیٹرنگ ڈیسک )آئی جی سندھ اے ڈی خواجہ نے کہا ہے کہ شکار پور میںپکڑا گیا خود کش بمبار غیر مقامی ہے جس سے تفتیش کی جا رہی ہے۔ایک نجی ٹی وی کے مطابق آئی جی سندھ نے بھی عیدکے روز شکارپور میں خودکش حملے کی جگہ کا دورہ کیا۔اس موقع پرمیڈیاسے گفتگوکرتے ہوئے آئی جی سندھ نے بتایاکہ پولیس کے جوانوں نے ہمت دکھائی اور بڑا نقصان نہیں ہوا ، انہوں نے کہاکہ حملے کی کوشش میں مارا گیا دہشت گردپکڑا گیا دہشت گرد اور ان کا سہولت کار تینوں غیر مقامی تھے۔واضح رہے کہ عید کے دن خان پور کی امام بارگاہ میں عید کی نماز کے دوران دو خودکش حملہ آوروں نے عید گاہ میں گھسنے کی کوشش کی جس پر ڈیوٹی پر معمور پولیس اہلکاروں نے بروقت کارروائی کرکے حملہ آوروں کو ہدف تک پہنچنے سے روک لیاتھا جبکہ ان میں سے ایک دہشت گرد خود کش بمبار کوپکڑ بھی لیا ۔