لاہور(آئی این پی) سوئی ناردن گیس کمپنی نے عیدالاضحی کی آمد پر ہزاروں ملازمین کی تنخواہوں میں کٹوتی کا پلان بنا لیا،گریجوایشن کی بنیاد پر بھرتی ڈیلی ویجزملازمین نے چھ سو پچاس روپے یومیہ کی بجائے پانچ سو چالیس روپے وصول کرنے سے انکار کر دیا۔
ذرائع کے مطابق سوئی ناردرن گیس کمپنی نے عیدالاضحی سے قبل ملازمین کی تنخواہوں سے ایک سو دس روپے فی کس کاٹنے کا فیصلہ کیا ہے ڈیلی ویجز پر کام کرنے والے ملازمین کو کم سے کم پانچ سو چالیس روپے جبکہ گریجوایشن کی بنیاد پر چھ سو پچاس روپے یومیہ دیا جاتا ہے، لیکن عید پر ملازمین کو ایک سو دس روپے فی کس کٹوتی کر کے تنخواہ دینے کا فیصلہ کیا گیا ہے،ذرائع نے بتایا کہ کمپنی ملازمین نے کم تنخواہ لینے سے انکار کر دیا ہے، جنہیں نوکری سے برطرف کرنے کی دھمکیاں بھی دی جا رہی ہیں ذرائع نے مزید بتایا کہ ملازمین کی تنخواہوں میں کٹوتی سے کمپنی کو لاکھوں روپے کی بچت ہو گی۔