اسلام آباد(مانیٹرنگ ڈیسک) کشمیرسے متعلق سفارتی مہم چلانے کے لئے تشکیل دیئے جانے والے سفارتی وفد میں شامل پاکستان پیپلز پارٹی کے رکن نواب علی وسان مقبوضہ کشمیر کی وزیراعلیٰ کے نام سے ہی لاعلم نکلے ۔محبوبہ مفتی کون ہے ؟ میں نہیں جانتا ۔
تفصیلات کے مطابق نجی ٹی وی چینل کے ایک پروگرام میں گفتگو کے دوران حکومت پاکستان کی جانب سے تشکیل دیئے جانے والے سفارتی وفد میں شامل پاکستان پیپلز پارٹی کے رکن نواب وسان سے جب کشمیر کی صورتحال سے متعلق سوالات کیے گئے تو کشمیر سے متعلق بنیادی معلومات سے ہی لاعلم نکلے ۔ انہیں نہ تو فاروق عبداللہ کا پتہ تھا اور نہ ہی محبوبہ مفتی کے متعلق کوئی معلومات۔ جب اینکر کی جانب سے سوال کیا گیا کہ آپ روس اور دیگر یورپی ممالک میں کشمیر معاملے پر پاکستان کا موقف ان کے سامنے رکھنے جائیں گے تو اس موقع پر کشمیر کے متعلق کیا موقف اختیار کریں گے تو اس کے جواب میں بھی وہ کوئی مناسب جواب نہ دے سکے اور ایک ہی بات دہراتے رہے کہ بھارت کشمیر میں معصوم اور غریب شہریوں کو قتل کر رہا ہے اور تشدد کا نشانہ بنا رہا ہے ۔جبکہ وہاں ایسی پر اسرار گولی چلائی جارہی ہے جس سے غریب افراد کی نظر ضائع ہو رہی ہے ۔ اس موقع پر انہوںنے بلاول بھٹو کے اس بیان کی توثیق بھی کر ڈالی کہ اس دورے پر جانے والے افراد صرف سرکاری خرچ پر عیاشی کرنے اور کھانے پینے کے بہانے ہی جا رہے ہیں ۔ جبکہ اس معاملے ان کی اپنی صورتحال بھی کچھ مختلف نظر نہ آئی اور وہ کشمیر کے متعلق بنیادی معلومات سے ہی نابلد نکلے۔

موضوعات:نواز شریف