کراچی(این این آئی)صدرمملکت ممنون حسین نے کہا ہے کہ پاناما لیکس سے متعلق کئی چیزیں سامنے آئی ہیں جب کہ ملکی دولت لوٹنے والا ہر شخص پکڑ میں آئے گا۔تعلیم،فنی تربیت نہ ہونے پرنوجوان منفی سوچ،دہشتگردی کی طرف مائل ہوئے،گذشتہ حکومتوں نے کوئی ترقیاتی کام نہیں کیے،دس سالوں سے کوئی ڈیم نہیں بنایا گیا، گورنر ہاؤس کراچی میں ایک تقریب سے خطاب کرتے ہوئے صدر ممنون حسین نے کہاکہ حکمرانوں نے ماضی میں بہت غلطیاں کیں جس کے باعث ہم اپنا بہت وقت برباد کر چکے، ہماری غلطیوں کی وجہ سے ہی تعلیمی ادارے تباہ ہوئے جب کہ ووکیشنل ٹریننگ پر توجہ نہیں دینے اور فنی تربیت نہ ہونے کے باعث نوجوان منفی سوچ، دہشت گردی کی طرف مائل ہوئے۔صدر ممنون حسین نے کہا کہ گزشتہ حکومتوں نے کوئی ترقیاتی کام نہیں کیے لیکن کوئی بھی اپنے گریبان میں نہیں جھانکتا، گزشتہ 10 سالوں میں کوئی ڈیم نہیں بنادیامیر،بھاشاڈیم فزیبلٹی تیارتھی،کام نہیں کیا گیا۔انہوں نے کہاکہ چین اقتصادی راہداری ترقی،خوشحالی لائے گی،کراچی:ہنرمندافراد کی ضرورت ہے۔ اب ہر شخص کا احتساب ہوگا۔ ان کا کہنا تھا کہ پاناما لیکس سے متعلق کئی چیزیں سامنے آئی ہیں، بدعنوانی اور ملکی دولت لوٹنے والا ہر شخص پکڑا جائے گا۔واضح رہے کہ صدر ممنون حسین نے گزشتہ روز بھی حیدرآباد میں ایک تقریب سے خطاب کرتے ہوئے کہا تھا کہ پاناما لیکس میں کچھ نام سامنے آئے ہیں اور کچھ آنے باقی ہیں۔ ان کا کہنا تھا کہ کرپشن کرنے والوں کے چہروں پر نحوست چھا جاتی ہے۔