لاہور ( این این آئی) احتساب عدالت نے جعلی ڈی جی نیب بن کر شہریوں کو لوٹنے والے ملزم کو چار روزہ جسمانی ریمانڈ پر نیب کے حوالے کر دیا ۔گزشتہ وز نیب حکام نے ملزم احسان الٰہی کو احتساب عدالت کے روبرو پیش کیا۔ نیب حکام نے بتایا کہ ملزم احسان الٰہی مصری شاہ کا رہائشی ہے اور اس نے ڈی جی نیب بن کر ماڈل ٹاؤن میں ایک مکان پر بھی قبضہ کر رکھا ہے ۔ملزم کو متعدد شکایات موصول ہونے کے بعد گرفتار کیا گیا ، ملزم خود کو ڈی جی نیب ظاہر کر کے شہریوں سے بھاری رقوم بٹورتا رہا ۔ ملزم کے قبضے سے نیب کے جعلی کاغذات ، گاڑیوں کی نمبر پلیٹس اور دوسری حساس دستاویزات بھی برآمد ہوئی ہیں ۔ لہٰذا معزز عدالت سے استدعا ہے کہ ملزم کا چودہ روزہ جسمانی ریمانڈ دیا جائے ۔ تاہم عدالت نے ملزم کو چار روزہ جسمانی ریمانڈ پر نیب کے حوالے کرتے ہوئے اٹھارہ مئی کو دوبارہ پیش کرنے کا حکم دیدیا۔