فیصل آباد(نیوزڈیسک )چیف ٹریفک آفیسر فیصل آباد کی خصوصی ہدائت پر بغیر نمبر پلیٹ ، اپلائیڈ فار ، غیر نمونہ ، مختلف ناموں ، مختلف رنگوں ، سرکاری مشابہت و مشکوک شکل و صورت کی حامل پلیٹس والی موٹر سائیکلوں ، کاروں ، ہائی لکس ڈالوں اور ڈبل کیبن گاڑیوں سمیت دیگر ٹرانسپورٹ کے خلاف سخت ترین کار وائی کا آغاز کر دیا گیا ہے جبکہ کالے شیشوں ،ٹنٹڈ گلاسز ، بلیک سکرینز اور مدھم شیڈز والی گاڑیوں کے مالکان کو بھی ہدائت کی گئی ہے کہ وہ فوری طور پر کالے شیشے ہٹا لیں بصورت دیگر ان کے ساتھ کوئی رعائت نہیں برتی جائے گی۔ سٹی ٹریفک پولیس فیصل آباد کے ذرائع نے بتا یا کہ قبل ازیں متعدد بار عوام الناس کو اس بارے میں آگاہ کیا گیا ہے لیکن انہوںنے حکومتی ہدایات پر خاطر خواہ انداز میں عمل نہیں کیا۔ انہوںنے کہا کہ اب تمام افراد کو حتمی و ارننگ جاری کی گئی ہے اور تمام ٹریفک وارڈنز کو بھی ہدائت کی گئی ہے کہ وہ بغیر نمبر پلیٹ ، اپلائیڈ فار ، غیر نمونہ ، مختلف ناموں ، مختلف رنگوں ، سرکاری مشابہت و مشکوک شکل و صورت کی حامل موٹر سائیکلوں ، کاروں ، ہائی لکس ڈالوں اور ڈبل کیبن گاڑیوں سمیت دیگر ٹرانسپورٹ کے خلاف سخت کاروائی کریں اور ایسی گاڑیوں کے چالانات کرنے سمیت انہیں قریبی تھانوں میں بند کرنے سے بھی گریز نہ کیا جائے ۔