اسلام آباد (نیوزڈیسک)جنید جمشید نے کہا ہے کہ وہ حکومت اور وفاقی وزیر داخلہ چودھری نثار علی خان کے شکر گزار ہیں اور انہیں خوشی ہے کہ عدالت نے ان پر حملہ کرنے والے ایک ملزم کا راہداری ریمانڈ دیا۔ایک انٹرویو میں انہوں نے کہاکہ ان اقدامات سے ملک میں قانون کی بالادستی قائم ہوگی اور آئندہ کوئی شخص کسی پر حملہ کرنے کی جرات نہیں کر سکے گا ، حکومت جو کر رہی ہے وہ بالکل درست ہے ٗلوگوں کو مارنے والے کب تک ہمارے ہیرو بنے رہیں گے۔جنید جمشید نے کہا کہ واقعہ کے اصل مجرم پیچھے بیٹھے ہیں جنہیں بے نقاب کر نا ضروری ہے تاہم گرفتار شخص حملہ آوروں میں سے تھا۔ انہوں نے کہاکہ ایف آئی آر اس لئے کٹوائی تھی تاکہ لوگوں کو یقین ہو جائے کہ ملک میں انصاف موجود ہے تاہم اکیلے شخص کو دیکھ کر وکیل خود ہی جج بن جاتے ہیں ٗہمارے ملک میں لاقانونیت ہے اس لیے ایسے واقعات پیش آتے ہیں ٗیہ لوگ دبئی یا کسی اور ملک میں ایسا کرنے کا سوچ بھی نہیں سکتے تھے کیونکہ انہیں پتہ ہے وہاں قانون کی بالادستی ہے۔ایک سوال پر جنید جمشید نے کہا کہ وہ اپنے ساتھ سکیورٹی نہیں رکھتے اور صرف دعا مانگ کر گھر سے نکلتے ہیں تاہم انہیں اپنے ساتھ سکیورٹی رکھنی چاہئے۔