اسلام آباد(نیوز ڈیسک) میڈیا رپورٹس کے مطابق مشہور نعت خواں اور مبلغ جنید جمشید پر حملہ کرنے والے افراد کو نیشنل ڈیٹابیس اینڈ رجسٹریشن اتھارٹی (نادرا) کے کوائف کی مدد سے شناخت کر لیا ہے۔ پولیس کے مطابق جندی جمشید پر حملہ کرنے والے افراد کی شاہ فیصل، عرفان اور اختر کے نام سے شناخت ہوئی ہے۔ نادرا کے کوائف کی مدد سے ان ملزمان کے رہائشی ایڈریس حاصل کر لئے گئے ہیں۔ بہت جلد ان ملزمان کی گرفتاری عمل میں لائی جائے گی۔ پولیس کے مطابق کے جنید جمشید پر حملہ کرنے والے ملزموں کا تعلق کراچی سے ہے، جو ممتاز قادری کے چہلم میں شرکت کیلئے راولپنڈی گئے تھے۔ تینوں ملزمان کو تفتیش کیلئے راولپنڈی لایا جائے گا۔واضح رہے کہ جنید جمشید پر بینظیر انٹرنیشنل ایئرپورٹ پر مشتعل افراد نے اچانک حملہ کرکے انھیں تشدد کا نشانہ بنا ڈالا تھا۔ جب جنید جمشید ایئرپورٹ لاؤنج سے باہر آئے تو وہاں موجود کچھ افراد نے ان کیخلاف نعرہ بازی شروع کر دی۔ ان افراد نے جنید جمشید کو دھکے دیئے اور انھیں گھونسے مارے، جس کے بعد انھیں بھاگ کر اپنی جان بچانا پڑی۔ اس واقعے کا علم ہوتے ہی وفاقی وزیر داخلہ چودھری نثار نے مقدمہ درج کرنے کا حکم دیا تھا۔ جنید جمشید کی درخواست پر ایئرپورٹ پولیس سٹیشن میں نامعلوم افراد کے خلاف مقدمہ درج کیا گیا۔