کراچی(نیوز ڈیسک)مذاکرات سے دھرنے کے شرکاء منتشر نہ ہوئے تو ایکشن ہو گا ،سندھ حکومت نے نمائش چورنگی پر بیٹھے مظاہرین کو واضح پیغام دے دیا۔ تفصیلات کے مطابق اسلام آباد کے ریڈ زون میں دھرنے پر بیٹھے مظاہرین سے اظہار یکجہتی کیلئے نمائش چورنگی پر بھی احتجاجی دھرنا جاری ہے جسے ختم کرنے کیلئے سندھ حکومت اور مظاہرین کے درمیان مذاکرات جاری ہیں اور مذاکرات کی ناکامی کی صورت میں ایکشن کیا جائے گا اور کسی بھی ناخوشگوار واقعے سے نمٹنے کیلئے پولیس کے دستے پہنچ گئے ہیں اور پوزیشن سنبھال لی ہیں۔
کراچی میں احتجاج کے باعث ایم اے جناح روڈ جب کہ سیکیورٹی خدشات کے باعث وزیراعلیٰ اورگورنر ہاؤس سے متصل سڑکیں بند ہیں جس کی وجہ سے شہریوں کو شدید پریشانی کا سامنا کرنا پڑ رہا ہے۔اسلام آباد کے ریڈ زون میں دھرنے پربیٹھے مظاہرین سے اظہاریکجہتی کے لیے کراچی کی نمائش چورنگی پربھی احتجاجی دھرنا جاری ہے جس کی وجہ سے ایم اے جناح روڈ نمائش چورنگی سے سی بریزتک بند ہے۔ اس کے علاوہ سیکیورٹی خدشات کے باعث وزیراعلیٰ ہاؤس اورگورنر ہاؤس کے متصل سڑک کو بھی کنٹینر لگا کرہرقسم کی آمدو رفت کے لیے بند کردیا ہے۔ شہر کی دونوں مرکزی سڑکیں بند ہونے سے لوگوں کو شدید مشکلات کا سامنا ہے، لاکھوں لوگ منٹوں کا سفر گھنٹوں میں طے کرنے پرمجبور ہیں۔ترجمان ٹریفک پولیس کا کہنا ہے کہ نمائش چورنگی بند ہونے سے ٹریفک کی روانی کو برقرار رکھا ہوا ہے، انہوں نے شہریوں سے اپیل کی ہے کہ ٹاورسے ضلع وسطی کی جانب جانے والے حضرات نیو پریڈی اسٹریٹ ، نشتر روڈ اور سولجربازارکی سڑک استعمال کریں جب کہ شہر کے وسطی علاقوں سے ٹاور، آئی آئی چندریگر روڈ اور اس کے ملحقہ علاقوں کی جانب جانے والے حضرات نیو پریڈی اسٹریٹ استعمال کریں۔