لاہور(نیوز ڈیسک) صوبائی وزیر قانون و پارلیمانی امور رانا ثنااللہ خان نے کہا ہے کہ مشرف کو عدالتی حکم پر بیرون ملک جانے کی اجازت دی گئی ،بلاول بھٹو ابھی بچہ ہے ایسے ہی گرتے گراتے سیاستدان بن جائے گا،پاک بھارت میچ میں پاکستان کے ساتھ دھاندلی ہوئی ، عمران خان کو چاہیے کہ وہ دھاندلی کے خلاف بھارت میں بھی دھرنا دیں ، حقوق نسواں بل کے ذریعے عورتوں کو عزت دی گئی ، مولوی عورتوں کو کمرے میں بند کر کے چابی جیب میں نہ رکھیں ۔ گزشتہ روز صوبائی وزیر رانا ثنااللہ نے تھانہ سمن آباد کی نئی عمارت کا افتتاح کر دیا۔ جس کے بعد تقریب اور میڈیا سے گفتگو کرتے ہوئے ان کا کہنا تھا کہ تھانہ سمن آباد کی نئی عمارت کے لیے جگہ پنجاب حکومت نے دی ہے جس پر عمارت تعمیر کرنے کے لیے 10کروڑ روپے لاگت آئی۔ انہوں نے کہا کہ امن و امان قائم کرنا محکمہ پولیس کی ذمہ داری ہے اور پولیس کو چاہیے کہ جو قانون کا احترام کرتا ہے اس کی عزت کی جائے اور جو قانون کا احترام نہیں کرتا اس کو سزا دی جائے۔انہوں نے پاکستان پیپلز پارٹی کے چیئرمین بلاول بھٹو زرداری کے بارے میں سوال کا جواب دیتے ہوئے کہا کہ بلاول بھٹو ابھی بچہ ہے ایسے ہی گرتے گراتے سیاستدان بن جائے گا۔ پنجاب حکومت کی جانب سے پاس کردہ حقوقِ نسواں بل کا دفاع کرتے ہوئے انہوں نے کہا کہ ہم نے اس بل کے ذریعہ عورتوں کو عزت دی ہے، مولوی عورتوں کو کمرے میں بند کر کے چابی جیب میں نہ رکھیں۔اس موقع پر وہ پاکستان تحریکِ انصاف کے چیئر مین عمران خان کو بھی نہیں بھولے اور کہا کہ پاک بھارت میچ میں ہماری کرکٹ ٹیم کے ساتھ دھاندلی ہو گئی ہے اور عمران خان کو چاہیے کے وہ دھاندلی کے خلاف بھارت میں بھی دھرنا دیں۔ایک اور سوال کے جواب میں انہوں نے کہا کہ مشرف کو عدالتی حکم پر بیرون ملک جانے کی اجازت دی گئی ہے۔