اسلام آباد(نیوز ڈیسک) سابق وزیر مذہبی امور و معروف ٹی وی اینکر ڈاکٹر عامر لیاقت حسین کو جان لیوا حملے کے خطرے کے پیش نظر محتاط رہنے کی ہدایت کردی گئی ہے۔نجی ٹی وی کے مطابق وفاقی وزارت داخلہ کی جانب سے ڈاکٹر عامر لیاقت حسین کو ایک خط بھیجا گیا ہے جس میں انہیں ان کی زندگی کو لاحق خطرات کے حوالے سے تنبیہہ کی گئی ہے۔ وزارت داخلہ کی جانب سے کہا گیا ہے کہ تحریک طالبان پاکستان کے خلاف مسلسل بیان بازی کے باعث عامر لیاقت کی زندگی کو خطرات لاحق ہیں اور انہیں کسی بھی وقت جان لیوا حملے کا سامنا کرنا پڑ سکتا ہے۔ دوسری طرف ڈاکٹر عامر لیاقت حسین نے سماجی رابطے کی ویب سائٹ ٹوئٹر پر اپنے پیغام میں کہا کہ نقل و حرکت سے پہلے کون سے متعلقہ حکام کو آگاہ کروں ؟ مجھ سے تو کسی نے رابطہ تک نہیں کیا، یہ جھوٹے اور مکاروں کی حکومت ہے اور نواز حکومت سے تحفظ کی بھیک نہیں مانگوں گا میرے لیے اللہ اور اس کا رسول ہی کافی ہیں۔یاد رہے کہ عامر لیاقت طالبان کیخلاف کھل کر بولتے ہیں۔