اسلام آباد (نیوزڈیسک) محکمہ موسمیات نے ملک کے بالائی علاقوں میں (آج) جمعرات سے ہفتہ تک مزید بارشوں کی پیش گوئی کرتے ہوئے کہاہے کہ اسلام آباد اور راولپنڈی سمیت ملک کے بالائی علاقوں میں بعض مقامات پر موسلادھار بارش اور ژالہ باری کا امکان ہے۔ محکمہ موسمیات کے مطابق جمعرات سے ہفتہ کے دوران بالائی خیبرپختونخوا (مالاکنڈ، ہزارہ، مردان، پشاور، کوہاٹ ڈویژن)، فاٹا، گوجرانوالہ، راولپنڈی ڈویژن، اسلام آباد اور کشمیر میں اکثر مقامات پر بارش ہو گی۔ اس دوران مالاکنڈ، ہزارہ، راولپنڈی ڈویژن اور کشمیر میں بعض مقامات پر موسلادھار بارش/ ژالہ باری کے علاوہ سرگودھا، لاہور، فیصل آباد، ڈی آئی خان، بنوں اور ساہیوال ڈویژن میں کہیں کہیں گرج چمک کے ساتھ بارش کا امکان ہے۔ جمعرات اور جمعہ کے روز مالاکنڈ، ہزارہ، پشاور، مردان، راولپنڈی ڈویژن، فاٹا، اور کشمیر میں موسلا دھار بارش کے باعث لینڈ سلائیڈنگ اور مقامی ندی نالوں میں طغیانی کا خدشہ ہے۔ آئندہ 24 گھنٹوں کے دوران ملک کے بیشتر علاقوں میں موسم خشک رہے گا تاہم شمال مشرقی بلوچستان (کوئٹہ، ژوب، سبی، قلات ڈویژن)، فاٹا میں کہیں کہیں اور مکران ڈویژن میں چند مقامات پر تیز ہوائیں اور گرج چمک کے ساتھ بارش کا امکان ہے۔ خیبر پختونخوا میں کہیں کہیں اور کشمیر، گلگت بلتستان، اسلام آباد، بالائی پنجاب (راولپنڈی، گوجرانوالہ، سرگودھا، لاہور ڈویژن) میں چند مقامات پر تیز ہوائیں اور گرج چمک کے ساتھ مزید بارش کا امکان ہے۔ گزشتہ 24 گھنٹوں کے دوران ملک کے بیشتر علاقوں میں موسم خشک رہا تاہم کوئٹہ، مکران، ژوب، بنوں، ڈی آئی خان ڈویژن میں چند مقامات پر گرج چمک کے ساتھ ہلکی بارش ہوئی۔ سب سے زیادہ بارش پسنی 5، بنوں، بارکھان، ژوب میں ایک ملی میٹر ریکارڈ کی گئی۔ بدھ کو اسلام آباد میں پولن کی مقدار 11225 فی مکعب میٹر ریکارڈ کی گئی۔ادھر نیشنل ڈیزاسٹر مینجمنٹ اتھارٹی (این ڈی ایم اے) کی سفارش پر سٹی ڈسٹرکٹ گورنمنٹ راولپنڈی نے ریسکیو 1122کو شدید بارشوں میں سیلابی کیفیت سے نمٹنے کےلئے 5الیکٹرانک کشتیاں فراہم کردیں ۔ شدید بارشوں کے نتیجے میں راولپنڈی اسلام آباد کے نشیبی علاقوں میں موثر ریسکیو آپریشن کے لیے ریسکیو 1122راولپنڈی کے پاس الیکٹرانک کشتیاں نہیں تھیں جس کو مد نظر رکھتے ہوئے این ڈی ایم اے نے حکومت پنجاب سے سفارش کی تھی کہ ریسکیو 1122راولپنڈی کو آپریشنل امور کے لیے الیکٹرانک کشتیاں فراہم کیں جائیں ۔