کراچی(نیوزڈیسک) ایم کیوایم کے منحرف رہنماڈاکٹر صغیر احمدنے کہا ہے کہ پارٹی کے نام پر مشاورت آخری مرحلے میں ہے۔ 23 مارچ کو خوشخبری دیں گے۔ اپریل کے دوسرے ہفتے میں بڑا جلسہ دنیا دیکھے گی۔میڈیا سے بات چیت کرتے ہوئے ڈاکٹر صغیر احمدنے کہا کہ کراچی کو لندن یا پیرس بنانے کے دعوے نہیں کرتے، اگر شہر کی روشنیاں لوٹا دیں تو یہی بڑی بات ہوگی۔ انہوں نے کہاکہ ہم کراچی کو دوبارہ تجارتی حب بنائیں گے۔پرانی پارٹی کی باتوں پر توجہ نہیں دیتے۔ ہم بڑے مقصد کے لیے آئے ہیں، لوگ ہمیں الجھاتے رہیں گے۔ قوم کی امیدوں کا مرکز بنیں گے۔ ہم وہ کام کریں گے جس مقصد کے لیے پاکستان بنا تھا۔ انہوں نے کہاکہ پارٹی کے نام کو حتمی مرحلے میں پہنچا دیا ہے۔ 23 مارچ کو پارٹی کے نام کو سامنے لائیں گے۔ نئی پارٹی کی اجازت کے لیے درخواست بھی دیں گے جس طرح دوسری جماعتوں کو اجازت ملی اسی طرح ہمیں بھی ملے گی۔ ڈاکٹر صغیر نے بتایا کہ اپریل کے دوسرے ہفتے میں بہت بڑا جلسہ کرینگے۔