کراچی (نیوز ڈیسک) پیپلز پارٹی میں فاروڈ بلاک بنانے کی تیاریاں شروع کردی گئی ہیں سابق صوبائی وزرا اراکین سندھ اسمبلی اور مختلف اضلاع کے صدور و جنرل سیریٹریز سمیت دیگر اہم شخصیات سے رابطے جلد متوقع ہیں۔ذرائع کے مطابق سابق صوبائی وزیر داخلہ ڈاکٹر ذوالفقار مرزا کے پارٹی سے علیحدگی کے بعد سابق صوبائی وزیر میر نادر مگسی ، صوبائی وزیر میر ہزار خان بجارانی ، سابق رکن قومی اسمبلی سلیم جان مزاری ، علی گوہر مہر ، نواب شبیر چانڈیو صوبائی وزیر ریونیو مخدوم جمیل الزماں ، نواب یوسف تالپور ، نواب غنی تالپور سمیت دیگر رہنما پیپلز پارٹی کی قیادت سے ناراض نظر آتے ہیں۔ذرائع کے مطابق ناہید خان اور ڈاکٹر صفدر عباسی نے بھی پیپلز پارٹی کی ناراض اراکین سے رابطوں کا فیصلہ کرلیا ہے ۔اس ضمن میں جلد ایک نئی پارٹی بے نظیر بھٹو شہید کے نام سے وجود میں آنے کے امکانات بڑھ گئے ہیں ۔ یاد رہے کہ گذشتہ روز وزیراعلی سندھ سید قائم علی شاہ نے میر ہزار خان بجارانی کی رہائش گاہ جا کر انہیں منانے کی کوشش کی جبکہ میر ہزار خان بجارانی ورکس اینڈ سروس کی وزارت چھن جانے کے بعد سے شدید نالاں ہیں۔