بدین(نیوزڈیسک)سابق وزیر داخلہ سندھ اور پیپلز پارٹی کے منحرف رہنما ڈاکٹر ذوالفقار مرزا نے کہا ہے کہ آصف زرداری آرمی چیف کے ریٹائر ہونے کا انتظار کر رہے ہیں ان کے سبکدوش ہوتے ہی وہ بھی واپس آجائینگے ۔بدین میں میڈیا سے بات کرتے ہوئے ذوالفقار مرزا نے کہا کہ جب تک پیپلز پارٹی عوامی جماعت تھی وہ بھی پارٹی کے ساتھ تھے لیکن جب پیپلز پارٹی نے سندھ کی فروخت شروع کی وہ ان کے خلاف کھڑا ہوگئے ۔ آصف علی زرداری اپنے بیان کی وجہ سے ملک سے باہر ہیں اور آرمی چیف کے ریٹائر ہونے کا انتظار کررہے ہیں جیسے ہی وہ سبکدوش ہوں گے سابق صدر بھی ملک میں واپس آجائینگے۔ذوالفقار مرزانے کہا کہ اندرون سندھ بھی اردو بولنے والوں کی کافی بڑی تعداد موجود ہے جنہیں نظر انداز نہیں کیا جاسکتا، انہوں نے پہلے ہی تجویز دی تھی کہ ایم کیو ایم میں موجود اچھے لوگوں کو الگ کردیا جائے ۔ مصطفی کمال کی اور ان کے ساتھیوں کی ایم کیو ایم سے علیحدگی خوش آئند ہے۔ اگر مصطفی کمال ایسے ہی رہے تو ان کا مستقبل روشن ہے اور اگر انہوں نے بھی قوم سے غداری کی تو ان کا حشر بھی قائد ایم کیو ایم جیسا ہوگا۔ انہوں نے کہا کہ مصطفی کمال ان کی پرانی پریس کانفرنس سن کر ان میں سے اہم نکات نکال کر بولتے ہیں، اس لئے مجھے بھی اچھا لگتا ہے۔