لاہور (نیوز ڈیسک) بھارت کی جانب سے ورلڈ ٹی ٹوئنٹی کپ کے دوران پاک، بھارت میچ سے لطف اندوز ہونے والے پاکستانی شائقین کے لئے ویزا انتظامات میں نرمی کا فیصلہ کیا ہے، واضح رہے کہ اس سے پہلے دھرم شالہ سے کولکتہ پاک بھارت میچ منتقل ہونے پر شائقین کو کافی مشکلات کا سامنا کرنا پڑ رہا تھا۔ ویزا نرمی پالیسی کے مطابق 65 سال سے زائد اور 15 سے کم عمر والے مقامی پولیس سٹیشن میں رپورٹ کرنے سے مستثنیٰ ہونگے، ویزا جاری کرتے وقت بھارتی حکام ریٹرن ائیر ٹکٹ طلب نہیں کریں گے۔ مداحوں کو ایک سے زائد شہرو ں کا قلیل مدتی ویزا جاری کیا جائے گا۔ بھارتی وزارت داخلہ کے مطابق جن پاکستانی مداحوں نے دھرم شالہ کا ویزا لگوا لیا تھا وہ اِسے کولکتہ کے ویزے میں تبدیل کرانے کیلئے پاکستان میں بھارتی مشنز سے رابطہ کرسکتے ہیں ، بھارت میچ کے ٹکٹس اور رہائش کی تفصیلات کی موجودگی میں پاکستانی مداحوں کو ان تمام شہروں کا ویزا دینے کو تیار ہے جہاں پاکستان کے میچز ہوں گے۔ بھارتی وزارت داخلہ کے مطابق اگر پاکستانی ٹیم سیمی فائنل یا فائنل تک پہنچی تو ویزوں کی تعداد بڑھائی جاسکتی ہے۔