کراچی(نیوزڈیسک) سندھ کے سابق وزیر اطلاعات و بلدیات شرجیل میمن کے خلاف چار ارب روپے کرپشن کی نئی تحقیقات کا آغاز جلد کیا جائے گا۔ذرائع کے مطابق وزیربلدیات و دیہی ترقی کی حیثیت سے شرجیل میمن نے 4ارب روپے کی سولر لائٹس کا کنٹریکٹ ایک سینما کے مالک کو دے دیا جبکہ سندھ کے6 اضلاع میں سولر لائٹس کا وجود تک نظر نہیں آیا ہے۔ ذرائع کے مطابق سولر لائٹس کی تنصیب کے نام پر 4 ارب روپے کی رقم آپس میں تقسیم کرلی گئی ہے۔ تحقیقاتی اداروں نے اس ضمن میں تفصیلات جمع کرنا شروع کردی ہیں جبکہ باضابطہ طور پر نیب کے ذریعے معاملے کی تحقیقات شروع کردی جائیں گی۔