کراچی(نیوزڈیسک) ایم کیو ایم کے سابق رہنما اور کراچی کے سٹی ناظم مصطفی کمال نے عوام سے رابطے اور اپنی نئی پارٹی کا پیغام پہنچانے کیلئے سوشل میڈیا کا سہارا لے لیا۔مصطفی کمال نے سماجی رابطے کی معروف ویب سائٹ ٹوئٹر اور فیس بک پر اپنے اکانٹ بنالیئے ہیں جس پر ان کے چاہنے والے اور ان کی نئی پارٹی میں شمولیت کے خواہش مند انہیں فالو کرسکتے ہیں جب کہ مصطفی کمال کی موجودہ رہائش گاہ کے باہر پوسٹر بھی لگائے گئے ہیں جس میں ان کے سوشل میڈیا اکانٹ کی آئی ڈیز درج ہیں۔ انہوں نے ٹوئٹر پر اپنے پیغام میں کہا ہے کہ وہ عوام کی جانب سے بے پناہ پیار اور حمایت ملنے پر ان کے شکر گزار ہیں اور یہ چیز ان کے لیئے باعث افتخار ہے ،انشا اللہ وہ عوام کے ساتھ مل کر پاکستان کی کھوئی ہوئی عظمت کو واپس لائیں گے۔علاوہ ازیںکراچی کے بعد حیدرآباد میں بھی مصطفی کمال کی حمایت میں وال چاکنگ کردی گئی، شہر کے مختلف علاقوں میں کی گئی وال چاکنگ میں مصطفی کمال کو خوش آمدید کہا گیا ہے۔تفصیلات کے مطابق سابق سٹی ناظم کراچی مصطفی کمال کی حمایت میں حیدرآباد میں بھی وال چاکنگ کردی گئی ہے، حیدرآباد کے علاقے لطیف آباد یونٹ نمبر 9، ٹھنڈی سڑک، گل سینٹر، فاطمہ جناح روڈ سمیت دیگر علاقوں میں کی گئی وال چاکنگ میں ویلکم مصطفی کمال اور قدم بڑھاو¿ مصطفی کمال ہم تمہارے ساتھ ہیں تحریر کیا گیا ہے، بعض علاقوں میں مصطفی کمال کے حق میں کی گئی وال چاکنگ پر رنگ کرکے اسے مٹادیا گیا ۔