کراچی (نیوز ڈیسک )جماعت اسلامی کراچی کے امیر حافظ نعیم الرحمن نے معروف علمائے کرام دارالعلوم نعیمیہ کے مہتمم مفتی منیب الرحمن، اشرف المدارس کے حکیم مظہر حسین اور جامعہ بنوریہ سائٹ کے مہتمم مفتی محمد نعیم سے علیحدہ علیحدہ ملاقاتیں کیں اور عاشق رسول ؐ ممتاز قادری کی پھانسی کے خلاف جماعت اسلامی کے تحت اتوار 13مارچ کو ہونے والے تحفظ ناموس رسالت ؐ مارچ میں شرکت کی دعوت دی ۔اس موقع پر ان کے ہمراہ جماعت اسلامی کراچی کے نائب امراء برجیس احمد ،مسلم پرویز ،جمعیت اتحاد العلماء کراچی کے صدر مولانا عبد الوحیداور جماعت اسلامی کراچی کے سکریٹری اطلاعات زاہد عسکری بھی موجو د تھے ۔اس موقع پر گفتگو کرتے ہوئے حافظ نعیم الرحمن نے کہا کہ ملک میں ایک بار پھر منظم منصوبہ بندی کے تحت سیکولراور لبرل طبقہ تحفظ ناموس رسالت ؐ کے قانون کے خلاف سرگرم عمل ہوگیا ہے اور حکومت نے ممتاز قادری شہید کو پھانسی کی سزا دے کر امریکہ اور مغربی قوتوں کو خوش کرنے کی کوشش کی ہے جس کے خلاف پاکستان کے 20کروڑ عوام سراپا احتجاج ہیں ۔انہوں نے کہا کہ تحفظ ناموس رسالت ؐ مارچ نئی تاریخ رقم کرے گا اور عوام بڑی تعدادمیں اس مارچ میں شریک ہوکر عشق مصطفی ؐ کا ثبوت دیں گے۔