اسلام آباد ( نیوز ڈیسک) پنجاب میں گاڑیوں کی کمپیوٹرائز رجسٹریشن کرنے اور نمبر پلیٹ گاڑی کے بجائے مالک کے نام پر رجسٹرڈ کرنے کیلئے محکمہ ایکسائز اور نیشنل بینک کے درمیان معاہدہ ہو گیا ہے۔ اس حوالے سے مسودہ قانون تیار کر لیا گیا ہے جو جلد وزیراعلیٰ کو منظوری کیلئے پیش کر دیا جائے گا۔ مجوزہ قانون کے تحت اب گاڑیوں کی رجسٹریشن ایکسائز کے بجائے ڈیلرز فراہم کریں گے اور گاڑیوں کی نمبر پلیٹ گاڑی کے بجائے مالک کے نام پر رجسٹرڈ کی جائے گی۔ سپیشل مانیٹرنگ یونٹ وزیراعلیٰ پنجاب سیکرٹریٹ کے سربراہ سلمان صوفی کا کہنا ہے کہ ڈیلر وہیکلز رجسٹریشن سسٹم کے ایم او یو پر دستخط کر دیئے گئے ہیں ۔ ان کا کہنا تھا کہ قانون کے منظوری کے بعد اس کا نفاذ ستمبر 2015سے کیا جائے گا اور اس قانون کے تحت جو بھی گاڑی ہو گی اس کی نمبر پلیٹ مالک کے نام پر ہوگی جبکہ شناختی کارڈ کی طرح نمبر پلیٹ بھی لائف ٹائم مالک کی ملکیت ہو گی۔