اسلام آباد (نیوز ڈیسک) دو دن قبل 29فروری 2016ءکو ملک ممتاز حسین قادری کو گورنر پنجاب سلمان تاثیر کے قتل کے جرم میں پھانسی کی سزا دی جا چکی ہے مگر تاحال اس فیصلے پر شدید عوامی ردعمل دیکھنے میں آرہا ہے۔ سب سے زیادہ تنقید کا نشانہ میڈیا کو بنایا گیا ہے جس نے اس واقعے کی اس طرح کوریج نہیں کی جو پاکستانی میڈیا کا خاصہ رہی ہے۔ اس حوالے سے ایک نجی ٹی وی پر بات کرتے ہوئے سینئر صحافی حامید میر نے کہا ہے کہ اس میں قصوروار میڈیا نہیں بلکہ پیمرا ہے جس نے تمام ٹی وی چینلز کو ایسا انتباہی خط ارسال کیا جس میں واضح طور پر درج تھا کہ چند لوگوں کے ہجوم کو بڑھا چڑھا کر نہ دکھایا جائے اس سے ملک کا امیج خراب ہوتا ہے۔ حامد میر کا کہنا تھا کہ اتنی پابندی کا سامنا ڈکٹیٹر شپ میں بھی نہیں رہا جتنا جمہوری دور حکومت میں دیکھنے کو مل رہا ہے۔