کراچی(نیوز ڈیسک)وفاقی وزیراطلاعات پرویز رشید نے کہا ہے کہ مارنے والوں کے ساتھ نہیں ، مار پڑنے والوں کے ساتھ کھڑے ہیں ، عدالت کے فیصلوں کا سب کو احترام کرنا چاہیے۔کراچی میں ریڈیو پاکستان کےنئے 10کلوواٹ کے ٹرانسمیٹرکی افتتاحی تقریب کےبعدمیڈیا سے گفتگو کرتے ہوئے وفاقی وزیراطلاعات و نشریات پرویز رشیدکا کہنا تھاکہ پاکستانی بڑے باشعور ہیں، امن و امان کے لئے کراچی کے ہر شہری نے بڑی قیمت ادا کی ہے،دہشت گردی ختم کر کے کراچی کی روشنیاں واپس لائیں گے۔سینیٹر پرویز رشید کا کہنا تھا کہ تربیت میں کوتاہی سے معاشرے میں بدامنی پھیلتی ہے، پاکستان کو لفظوں کی جنگ نے بہت نقصان پہنچایا، ماضی کی غلطیوں کو دہرانے کے بجائے انھیں درست کرنا اور ان پر قابو پانا ہوگا۔پنجاب اسمبلی میں حقوق تحفظ خواتین بل کی منظوری کے حوالے سے پوچھے گئے سوال پر پرویز رشید کا کہنا تھا کہ ایک طرف وہ لوگ کھڑے ہیں جو ماں بہن بیٹیوں پر ظلم اور تشدد کرنا چاہتے ہیں اور دوسری طرف وہ لوگ کھڑے ہیں جو ماں، بہن بیٹیوں کے سروں پر ہاتھ رکھ رہے ہیں اور ہماری حکومت دوسری طرف کھڑی ہے اور ہمیں اس پر فخر ہے

موضوعات:پرویز رشید