دبئی (نیوزڈیسک) دبئی میں پاکستانی شہری نے غیرملکی خاتون سے موبائل فون چھین لیا اور وہاں سے بھاگنے کی کوشش کے دوران خاتون کے شور مچانے پر اسے پیٹنے کے لیے واپس آگیا لیکن اسی دوران وہاں موجود افراد نے پکڑلیا اور بعدازاں پولیس کے حوالے کردیا۔ دبئی کی عدالت کو بتایاگیاکہ 28دسمبر کو صبح تقریباً ساڑھے چھ بجے فلپائن سے تعلق رکھنے والی 38سالہ خاتون ٹیچر ابوبکرالصدیقی روڈ پر اپنے کام کیلئے میٹروسٹیشن کی طرف جارہی تھی کہ کسی نے اس کا بایاں کندھا پکڑا ، موبائل فون چھینا اور دھکادے کر زمین پر گرادیا۔ خاتون نے بتایاکہ جیسے ہی وہ نیچے گریں توچیخنا چلاناشروع کردیا جبکہ حملہ آور نے بھاگنا شروع کردیا، پھر اچانک وہ واپس آیا اور مارنا شروع کردیا، میں خوفزدہ ہوگئی اور زمین پر پڑی رہی ،پھر اسے سکون سے دور جاتے دیکھتے رہی لیکن جب ہی وہاں کچھ لوگوں پر نظر پڑی توان سے مدد کی درخواست کی جنہوں نے بھاگ کر ملزم کو دبوچ لیا۔ اسی دوران ملزم نے موبائل فون کوڑے کے ڈبے میں پھینک دیا جبکہ دس منٹ بعد پولیس نے موقع پر پہنچ کر 25سالہ شخص کو حراست میں لے لیا۔ عدالت اس مقدمے کا فیصلہ 16مارچ کو سنائے گی ۔