کراچی (نیوزڈیسک) سندھ کابینہ اجلاس کی اندرونی کہانی منظر پر آگئی۔ سندھ میں دوبڑے طاقتوروں کے درمیان لفظی جنگ شروع ہوگئی۔ سندھ کابینہ کے اجلاس میں سیکریٹری تعلیم فضل اللہ پیچوہو اور سینئروزیرخزانہ مراد شاہ میں تلخ جملوں کا تبادلہ ہوا۔ سیکریٹری تعلیم فضل اللہ پیچوہو سابق صدر آصف زرداری کے بہنوئی ہیں جبکہ مراد علی شاہ کے پاس چار وزارتیں،سابق وزیراعلی کے بیٹے ہیں۔اجلاس میں مرادعلی شاہ اور سیکریٹری تعلیم کے درمیان جھڑپ محکمہ تعلیم کی ترقیاتی منصوبوں پر بریفنگ کے دوران ہوئی۔ اجلاس کے دوران ایک موقع پر وزیر خزانہ نے سیکریٹری تعلیم سے مکالمہ کرتے ہوئے کہا کہ آئیں بائیں شائیں نہ کریں،جو میں پوچھ رہا ہوں وہ بتائیں۔ اس کے باوجود کابینہ اجلاس کے دوران سیکریٹری تعلیم کا سینئر وزیرخزانہ کے سوال کا جواب دینے سے گریز کیا۔ جواب نہ دینے پر مراد علی شاہ بھی غصے میں آگئے جس پر سابق صدر آصف زرداری کے بہنوئی سیکریٹری تعلیم فضل اللہ پیچوہو کابینہ اجلاس چھوڑ کر چلے گئے۔مرادعلی شاہ اور فضل اللہ پیچوہو کے درمیان تلخ کلامی پر وزیراعلی کی معنی خیز خاموشی تھی۔