کراچی (نیوزڈیسک)پاکستان تحریک انصاف کے سربراہ عمران خان کی سابق اہلیہ ریحام خان نے کہا ہے کہ مستقبل میں سیاست میں آنے کا ارادہ نہیں ہے ۔فی الحال میڈیا کے شعبے میں کام کروں گی ۔وہ جمعہ کو کراچی پریس کلب کے غیر رسمی دورے کے موقع پر میڈیا سے گفتگو کررہی تھیں ۔کراچی پریس کلب آمد پر کلب کے سیکرٹری اے ایچ خانزادہ نے ان کا خیرمقدم کیا اور انہیں سندھ کا روایتی تحفہ اجرک پیش کیا ۔انہوں نے کہا کہ کراچی روشنیوں کا شہر ہے ۔کراچی میں امن قائم ہونے سے ماضی کی رونقیں بحال ہورہی ہیں ۔انہوں نے کہا کہ میں اپنے ماضی کا ذکر نہیں کرنا چاہتی ،جو ہوا اب اسے بھول چکی ہوں ۔اب میری ترجیح اپنی پرانی فیلڈ ہے ۔صحافت میں رہ کر حق اور سچائی کے لیے آواز بلند کرتی رہوںگی ۔میرا مشن ہے کہ صحافت میں تبدیلی آئے اور یہ تبدیلی ایسی ہونی چاہیے جس سے عوام تک صرف سچ کی آواز پہنچے ۔ انہوں نے کہا کہ میڈیا جو کچھ میرے بارے میں آیا وہ غلط ہے ۔انہوں نے کہا کہ نہ میرا پہلے سیاست میں آنے کا ارادہ تھا اور نہ اب ہے ۔