لاہور( این این آئی) مسلم لیگ (ن) کے رکن قومی اسمبلی حمزہ شہباز کی اہلیہ ہونے کا دعویٰ کرنے والی عائشہ احد نے عدالتی حکم کے باوجود سکیورٹی نہ ملنے پر آئی جی پنجاب اور سی سی پی اولاہور کیخلاف توہین عدالت کی درخواست دائر کردی۔عائشہ احد کی جانب سے لاہورہائیکورٹ میں دائر توہین عدالت کی درخواست میں موقف اختیار کیاگیا ہے کہ حمزہ شہباز نے شادی کی اور اب اس کا منظر عام پر نہیں لانے دیاجارہا اس حوالے سے جان سے مارنے کی دھمکیاں دی گئیں جس کے بعد ہائیکورٹ نے سکیورٹی فراہم کرنے کاحکم دیا لیکن عمل درآمد نہیں کیا جارہا اور آئی جی پنجاب اور سی سی پی او ٹال مٹول سے کام لے رہے ہیں لہٰذا عدالت سے استدعا ہے کہ فریقین کیخلاف توہین عدالت کی کاروائی عمل میں لائی جائے جبکہ سکیورٹی فراہم کی جائے۔