ن لیگ اور پی ٹی آئی میں ایک اور جوڑ پڑ گیا،”پلان بی“پر بھی ٹاکرا

1 ‬‮نومبر‬‮ 2015 |

لاہور( نیوزڈیسک)ن لیگ اور پی ٹی آئی میں ایک اور جوڑ پڑ گیا،”پلان بی“پر بھی ٹاکرا،پاکستان مسلم لیگ (ن) اور تحریک انصاف نے بلدیاتی انتخابات کے پہلے مرحلے میں آزاد حیثیت میں کامیابی حاصل کرنے والے امیدوار وں کی حمایت حاصل کرنے کیلئے منصوبہ بندی کر لی ، (ن) لیگ اضلاع کی سطح پر وزراءاور مرکزی رہنماﺅں کے ذریعے رابطے کرے گی ۔ تفصیلات کے مطابق پنجاب کے 12اضلاع میں ہونے والے بلدیاتی انتخابات میں آزاد امیدواروں کی ایک بڑی تعداد بھی کامیاب ہوئی ہے اور بلدیاتی اداروں کی تکمیل کے لئے ان کی حمایت نا گزیر ہے ۔ انتخابات میں پہلے نمبر پر رہنے والی حکمران جماعت (ن) لیگ نے آزاد امیدواروں سے فوری رابطوں کی منصوبہ بندی کر لی ہے اورہر ضلع میں وزراءاور مرکزی رہنماﺅں کے ذریعے آزاد امیدواروں سے رابطے کر کے انہیں اپنے ساتھ شامل ہونے کے لئے قائل کیا جائے گا ۔ دوسری طرف پی ٹی آئی کے رہنماﺅں نے بھی اس سلسلہ میں رابطے شروع کرنے کا فیصلہ کیا ہے جس کے لئے مرکزی اور صوبائی رہنما رابطے بڑھائیں گے ۔ذرائع کے مطابق ماضی کی روایات کو دیکھا جائے تو قوی امکان ہے کہ آزاد امیدواروں کی اکثریت پہلے نمبر پر رہنے والی حکمران جماعت کے ساتھ ہی جانے کو ترجیح دیں گے ۔