کوئٹہ (نیوزڈیسک) کوئٹہ میں کالعدم تنظیموں کے دو اہم کمانڈروں سمیت 30 فراریوں نے ہتھیار ڈال دیے۔صوبائی وزیر اور مسلم لیگ ن کے رہنما چنگیز مری کے رہائش گاہ پر فراریوں نے ہتھیار ڈال کر شدت پسندی چھوڑنے اور ملک سے وفاداری کا حلف اٹھا لیا۔ہتھیار ڈالنے والے کمانڈرز اور ان کے ساتھیوں کا تعلق کالعدم بلوچ لبریشن فرنٹ سے ہے۔کمانڈر میر جان مری کے مطابق وہ گزشتہ دس سالوں سے ملک دشمن سرگرمیوں میں مصروف تھے۔اس موقع پر نواب چنگیز مری کا کہنا تھا کہ اب بھی بہت فراری ہتھیار ڈالنے کے لیے تیار ہیں مگر فراریوں کے لیے بنائے گئے مشکل میکنزم کی وجہ بہت سے لوگ واپس چلے گئے۔نواب چنگیز مری کے مطابق وفاقی سطح پر پرامن بلوچستان کے نام سے اعلان ہونے والے پیکج پر عمل درآمد نہیں ہو سکا جس کی وجہ سے فراریوں کو قومی دھارے میں لانے کے لیے مشکلات پیدا ہورہی ہیں۔انہوں نے کہا کہ اگر اعلان شدہ پیکج پر جلد عمل درآمد شروع ہوجائے تو 80 فیصد فراری ہتھیار ڈالنے کے لیے تیار ہیں۔