لاہور(نیوزڈیسک)ہائیکورٹ نے مسلم لیگ (ن) کے خواجہ احمد حسان کے بلامقابلہ چیئرمین یونین کونسل منتخب ہونے کا نوٹیفیکیشن کا لعدم قرار دینے کی درخواست پر الیکشن کمیشن کو عدالتی فیصلہ آنے تک خواجہ احمد حسان کی کا میا بی کا نوٹیفیکیشن جاری کرنے سے روکتے ہوئے آئندہ سماعت پر فریقین کے وکلاءکو تفصیلی بحث کے لئے طلب کر لیا ۔گزشتہ روز لاہور ہائیکورٹ کے جسٹس شاہد کریم نے کیس کی سماعت کی۔ درخواست گزار کی جانب سے موقف اختیار کیا گیا کہ خواجہ احمد حسان یونین کونسل 107سے بلا مقابلہ چئیرمین منتخب ہوئے ہیںجبکہ وہ لاہور ڈویلپمنٹ اتھارٹی کے وائس چیئرمین ہونے کی حیثیت سے عوامی عہدے کے اہل نہیں۔لوکل گورنمنٹ ایکٹ کی شق 27کے تحت سرکاری عہدے پر براجمان شخص عوامی عہدے کا اہل نہیں ہے لہٰذا معزز عدالت سے استدعا ہے کہ عدالتی فیصلے تک الیکشن کمیشن کو خواجہ احمد حسان کی جیت کا نوٹیفیکیشن جاری کرنے سے روکا جائے۔ دوران سماعت الیکشن کمیشن کے وکیل نے عدالت کو بتایا کہ درخواست گزار متاثرہ فریق نہیں لہٰذا درخواست قابل سماعت نہ ہونے کے باعث غیر موثر قرار دے کر مسترد کی جائے۔جبکہ خواجہ احمد حسان کے وکیل نے موقف اختیار کیا کہ ان کے پاس ای ڈی اے کے وائس چیئر مین کا یہ عہدہ اعزازی تھا ۔فاضل عدالت نے دلائل سننے کے بعد عدالتی فیصلہ آنے تک الیکشن کمیشن کو خواجہ احمد حسان کی جیت کا نوٹیفیکیشن جاری کرنے سے روکتے ہوئے فریقین کے وکلاءکو تفصیلی بحث کے لئے طلب کر لیا اور کیس کی مزید سماعت 3 نو مبر تک ملتوی کر دی ۔