لاہور(نیوزڈیسک) صوبائی دارلحکومت کے علاقہ کوٹ لکھپت میں نامعلوم خاتون کو قتل کرنے کے بعد جسم کے اعضاءدو بوریوں میں بند کر کے کوڑے کے ڈھیر پر پھینک دیئے گئے ،پولیس نے دونوں بوریاں قبضے میں لے کر تحقیقات کا آغاز کر دیا جبکہ علاقے میں خوف و ہراس پھیل گیا ۔ بتایا گیا ہے کہ گزشتہ روز کوٹ لکھپت کے علاقے میں راہگیروں نے کوڑے کے ڈھیر پر پڑی ہوئی خون آلودبوریاں دیکھ کر پولیس کو اطلاع دی ۔ پولیس نے موقع پر پہنچ کر انہیں کھول کر دیکھا تو اس میں سے انسانی اعضاءبرآمد ہو گئے ۔ ایس پی ماڈل ٹاﺅن مستنصر فیروز کا کہنا ہے کہ بوریوں سے برآمد ہونے والے اعضاءخاتون کے ہیں جسے قتل کرنے کے بعد اعضاءبوریوں میں بند کر کے کوڑے کے ڈھیر پر پھینکے گئے ، لاش کے اعضاءقبضے میں لے لیے ہیں اور تفتیش کی جا رہی ہے لیکن تاحال شناخت نہیں ہو سکی ۔ انہوں نے کہا کہ واقعے کی مختلف پہلوﺅں سے تفتیش کی جا رہی ہے اور قریبی لوگوں سے بھی پوچھ گچھ کی جا رہی ہے ۔ انہوں نے کہا کہ لاش کے اعضاءبھی مکمل نہیں تاہم انہیںڈی این اے ٹیسٹ کے لئے بھجوایا جائےگا تاکہ شناخت ہو سکے ۔ واقعے کی اطلاع پر لوگوں کی بڑی تعداد بھی موقع پر جمع ہو گئی جبکہ علاقہ بھر میں میں خوف و ہراس کی فضاءپھیل گئی ۔