کراچی (نیوزڈیسک)کراچی میں متحدہ قومی موومنٹ نے دعویٰ کیا ہے کہ جمعرات کی رات کو رینجرز نے لانڈھی کے علاقے میں ایم کیو ایم کے یونٹ کے دفتر اور جماعت کے کارکنوں کے گھروں پر چھاپے مار کر یونٹ انچارج سمیت سات افراد کو گرفتار کر لیا ہے۔ایم کیو ایم کی رابطہ کمیٹی کے رکن امین الحق نےبرطانوی خبررساں ادارے
کو بتایا کہ رینجرز کی طرف سے چھاپے کے دوران ان کے ساتھ سادہ لباس میں لوگ بھی تھے جو یہ کارروائی کر رہے تھے جبکہ رینجرز ان کی نگرانی کر رہے تھے۔امین الحق نے الزام عائد کیا کہ رینجرز ایم کیو ایم کے لانڈھی یونٹ اور سیکٹر کے دفاتر کے باہر مبینہ طور پر ایم کیو ایم حقیقی کے مسلح افراد کو بٹھا کر چلے گئے ہیں۔
امین الحق کا کہنا تھا کہ ایم کیو ایم کے لانڈھی سیکٹر اور یونٹ کے دفاتر پر چھاپہ ایک ایسے وقت مارا گیا ہے جب ایم کیو ایم جشن آزادی کے موقعے پر جناح گراؤنڈ میں دو روزہ جشن منا رہی ہے، اور اس کے علاوہ متحدہ کے کارکن جشن آزادی کے موقعے پر شہر میں جلوس نکال رہے ہیں۔امین الحق نے کہا کہ ایم کیو ایم کو آزادی کا جشن منانے سے روکا جا رہا ہے۔یاد رہے کہ ایم کیو ایم کی طرف سے اپنے منتخب اراکین کے استعفے جمع کرانے کے بعد حکومت ایم کیو ایم سے بات چیت کے لیے کوشش کر رہی ہے۔ایم کیو ایم کے اراکین نے اپنے استعفے پیش کرتے وقت 19 وجوہات بیان کی تھیں جن میں کراچی میں رینجرز کی طرف سے جاری آپریشن کے بارے میں شدید تحفظات ظاہر کیے گئے تھے