لاہور(نیوزڈیسک) پاکستان انٹرنیشنل ایئر لائنز (پی آئی اے) کی 29 جولائی سے 7 اگست کے دوران 30 مقامی اور انٹرنیشنل پروازیں منسوخ ہوئیں۔ایک نجی ٹی وی چینل کے مطابق سرکاری ذرائع نے بتایا کہ 29 جولائی کو 4 پروازیں منسوخ ہوئیں جبکہ انتظامیہ نے اُسی دن لاہور-دمام-لاہور کیلئے A-320 طیارےکے بجائے B-777 استعمال کیا، جس کی وجہ سے تقریباً 150 نشستیں خالی رہیں۔دوسری جانب، لاہور-کراچی کی پرواز PK-305 کیلئے B-777 کے بجائے A-320 طیارہ استعمال کیا گیا، جس کے نتیجہ میں بھاری آف لوڈنگ کرنا پڑی۔31 جولائی کو ائیر لائن نے کراچی-لاہور کی پرواز PK-306 کیلئے B-777 کے بجائے A-320 استعمال کیا، جس کی وجہ سے تقریباً 150 مسافروں کو آف لوڈ کرنا پڑا۔کراچی-لاہور-کراچی کی پروازوں (PK-306-307 ) کیلئے A-320 کے بجائے B-777 استعمال کرنے کی وجہ سے 150 نشستیں خالی رہ گئیں۔6 اگست کو پانچ پروازیں منسوخ ہوئیں جبکہ لاہور-ریاض-لاہور (PK-725-726) اور لاہور-کراچی کی پرواز PK-305 پرA-320 کی جگہ دو B-777 استعمال کیے جانے کی وجہ سے 300 نشستیں خالی رہ گئیں۔پی آئی اے ترجمان عامر میمن نے بتایا کہ قومی ایئر لائن نے اپنے مسافروں کوبہت پہلے ہی پروازیں منسوخ ہونے کا بتا دیا تھا۔انہوں نے کہا’مختلف منزلوں کی ضرورت کو مد نظر رکھتے ہوئے ان پروازیں کو منسوخ یا مختلف نشستوں والے طیارے استعمال کرنا پڑے‘۔میمن کے مطابق، پی آئی اے 18 اگست سے اسلام آباد – بیجنگ کیلئے ہر ہفتے تیسری جبکہ کراچی-لاہور-کراچی کیلئے روزانہ پانچویں پرواز شروع کرے گا۔ادھر، پاکستان ائیر لائن پائلٹس ایسوسی ایشن کے جنرل سیکریٹری سہیل احمد نے کہا کہ ایک طرف پی آئی اے انتظامیہ ریٹائر پائلٹس کی خدمات حاصل کرنے پر غور کر رہی ہے تو دوسری جانب مستقبل قریب میں ریٹائر ہونے والے پائلٹس کیلئے معاہدوں کا جواز پیدا کرنے کیلئے دوسرے پائلٹس کی پروموشن خطرے میں ڈالی جا رہی ہے۔انہوں نے بتایا کہ انتظامیہ نے پچھلے چار سالوں سے بڑی تعداد میں کیڈٹ پائلٹس کا تربیتی عمل روک رکھا ہے۔