لاہور(نیوزڈیسک)پاکستان عوامی مسلم لیگ کے سربراہ شیخ رشیداحمد نے کہا ہے کہ سپریم کورٹ کے فوجی عدالتوں کو بر قرار رکھنے کے فیصلے سے جمہوریت اور نواز شریف کو فائدہ ہوا ہے ،ایم کیو ایم کےلئے مشکل صورتحال شروع ہو گئی ہے اور 30دسمبر تک معاملات واضح ہو جائیں گے،پیپلزپارٹی کا بھی امتحان شروع ہونے والاہے اس کے بھی کیس تیار ہو رہے ہیں اور اس کا بھی ٹرائل ہوگا ۔ ایک انٹر ویو میں شیخ رشید احمد نے کہا کہ پہلے کہا جاتا تھا کہ فوج اپنے گھر سے احتساب کا عمل شروع کرے اور فوج نے ایسا کر دیا ہے ۔ جو فوج اپنے افسران کااحتساب کر سکتی ہے وہ سیاستدانوں کوکیوں چھوڑے گی ، فوج کو احتساب کرنا چاہیے ۔ اس ملک میںسات خاندان اور انکے تیس بچے اس ملک کو ”ڈکار “گئے ہیں اور یہ ایک دوسرے کے لئے انشورنس ہیں ۔ انہوں نے کہا کہ پنجاب میں بلدیاتی انتخابات بڑا معرکہ ہوگا اور پیپلز پارٹی کے دم توڑنے کے بعداصل مقابلہ (ن) لیگ اور تحریک انصاف میں ہوگا۔ البتہ یہ بات ضرور سوچنے والی ہے کہ پیپلز پارٹی کا ووٹ کس طرف جائے گا ۔ انہوں نے کہا کہ عمران خان ، فنکشنل لیگ اور نواز شریف سندھ نہیں جارہے اوور وہاں کی عوام کو وڈیروں کے رحم و کرم پر چھوڑ دیا گیا ہے۔