ٹوکیو(نیوزڈیسک))جاپان میں مقیم 10ہزار پاکستانی وزیر خزانہ اسحاق ڈار کی جانب سےڈیجیٹل پاسپورٹ کے اجراء کے حوالے سے کیا جانے والا وعدہ وفا ہونے کے منتظر ہیں۔ انہوں نے اپنے دورہ جاپان کے موقع پر پاکستانیوں سے وعدہ کیا تھا کہ رواں برس جاپان میں مقیم پاکستانیوں کے لیے ڈیجیٹل پاسپورٹ کے اجراء کا عمل شروع ہوجائےگا،معروف صحافی عرفان صدیقی کے مطابق جولائی کا مہینہ اختتام کے قریب ہے لیکن جاپان میں پاکستانی سفارتخانے کو تاحال جاپان میں ڈیجیٹل پاسپورٹ کے اجراء کے حوالے سے کوئی آگاہی نہیں ہے ، جس سے جاپان میں پاکستانی کمیونٹی میں مایوسی پائی جاتی ہے۔ اس حوالے سے جاپان میں مقیم پاکستانیوں نے اپنے خیالات کا اظہار کرتے ہوئے کہا ہے کہ ڈیجیٹل پاسپورٹ نہ ہونے سے شدید مسائل کا سامنا ہے ، مینول پاسپورٹ کے باعث ہمارے ویزے نہیں لگ سکتے جبکہ اب تو جاپانی ویزہ بھی لگنا مشکل ہوتا جارہا ہے ، جبکہ پاکستان جانا ہر پاکستانی کے لیے ممکن نہیں ہوتا ، کمیونٹی کے مطابق اسحاق ڈار چند ماہ قبل اپنے دورہ جاپان میں کمیونٹی سے اپنی اور وزیر اعظم نواز شریف کی جانب سے وعدہ کرکے گئے تھے تاہم تاحال یہ وعدہ پورا ہوتا نظر نہیں آرہا ہے ، کمیونٹی نے وزیر اعظم اور وزیر خزانہ سے مطالبہ کیا ہے کہ وہ اپنا وعدہ پورا کریں اور رواں سال پاکستانیوں کے لیے جاپان سے ڈیجیٹل پاسپورٹ کے اجراء کو یقینی بنائیں۔