اسلام آباد (نیوز ڈ یسک) وفاقی کابینہ کی اقتصادی رابطہ کمیٹی (ای سی سی) نے رمضان کے لیے 39 ارب روپے کے خصوصی ریلیف پیکیج کی منظوری دے دی ہے۔
تفصیلات کے مطابق اجلاس کی صدارت وزیر خزانہ محمد اورنگزیب نے امریکا سے ویڈیو لنک کے ذریعے کی، جس میں ایک نکاتی ایجنڈے پر غور کیا گیا۔ سرکاری اعلامیے میں بتایا گیا کہ کمیٹی نے وزیراعظم کے رمضان ریلیف پیکیج 2026 کی منظوری دے دی۔وزارتِ تخفیفِ غربت و سماجی تحفظ کی جانب سے پیش کی گئی سمری کے مطابق اس پروگرام کے تحت مستحق خاندانوں کو فی کس 13 ہزار روپے فراہم کیے جائیں گے، اور رقوم رمضان کے پہلے ہفتے میں منتقل کرنے کا منصوبہ ہے۔حکام کے مطابق امدادی رقم ڈیجیٹل والٹس کے ذریعے تقسیم کی جائے گی۔ پیکیج کے لیے 29 ارب روپے رواں مالی سال کے بجٹ سے مختص کیے جائیں گے جبکہ 10 ارب روپے پہلے سے دستیاب فنڈز سے شامل کیے جائیں گے۔
اس اسکیم سے ملک بھر میں تقریباً ایک کروڑ بیس لاکھ خاندانوں کو فائدہ پہنچنے کی توقع ہے۔
