اسلام آباد(نیوز ڈیسک) سابق صدر جنرل (ر) پرویز مشرف نے کہا ہے کہ آرمی چیف جنرل راحیل شریف کی مدت ملازمت میں توسیع ہونی چاہیے۔ نجی ٹی وی سے گفتگو کرتے ہوئے سابق صدر جنرل (ر) پرویز مشرف نے کہا کہ اگر پالیسی کا تسلسل چاہیے تو حکومت کو موجودہ آرمی چیف کی مدت ملازمت میں توسیع کرنی چاہیے۔ انہوں نے مزید کہا کہ نواز شریف مجھے انتقام کا نشانہ بنارہے ہیں، مجھے تنگ کرنے کیلئے بے نظیر بھٹو قتل کیس لال مسجد کیس اور ججز نظر بندی کیس بنائے گئے۔ بے نظیر بھٹو جیسے مقدمات کی تحقیقات نہیں ہوتی، مرتضی بھٹو بے نظیر بھٹو کے دوراقتدار میں قتل ہوئے لیکن تحقیقات نہیں ہوئی۔ سابق صدر پرویز مشرف نے کہا کہ عزیز بلوچ ہی اب بتائیں گے کہ محترمہ بے نظیر بھٹو کا قتل کس نے کرایا تھا۔