لاہور(نیوزڈیسک) وفاقی وزیرریلوے خواجہ سعد رفیق نے اس اُمید کا اظہار کیا ہے کہ گوجرانوالہ ریل حادثے کی جے آئی ٹی رپورٹ عید سے پہلے مکمل ہوجائے گی۔ انہوں نے یہ بات ریلوے ہیڈکوارٹرز میں میڈیا کے سوالات کے جواب میں کہی۔ وزیر ریلوے نے کہا کہ ان کی سیاست ، سیاسی مخالفین کے علاوہ بہت سے مافیاز کا بھی ہدف ہے جس سے وہ گھبرانے والے نہیں، انہوں نے ساری عمر مشکل سیاست کی ہے لیکن ریلوے کو اس کھیل میں معاف رکھا جائے۔ انہوں نے کہا کہ میڈیا کا رویہ بحیثیت مجموعی مثبت اور قابلِ قدر ہے لیکن بریکنگ نیوز کی مسابقت میں بسا اوقات ضروری احتیاط مدنظر نہیں رکھی جاتی۔