اسلام آباد(نیو زڈیسک)حساس اداروں کی جانب سے انکشاف کیا گیا ہے کہ کراچی شہر میں یونیورسٹیاں اور کالجز طلباکا ذہن تبدیل کر کے انہیں کالعدم تنظیموں میں شمولیت اور ان کے لیے کام کرنے کی ترغیب دے رہے ہیں ۔نجی ٹی وی چینل کے ذرائع کا کہنا ہے کہ حساس اداروں کی جانب سے رپورٹ تیار کی گئی ہے جس میں کالعدم تنظیموں کے مربوط نیٹ ورک چلانے کا انکشاف کیا گیا ہے ۔ رپورٹ میں مزید ذکر کیا گیا ہے کہ یہ اساتذہ اور ان کے طلباکالعدم تنظیموں کے لیے کام کرتے ہیں اور یہ تعلیمی اداروں میں آنے والے طلباکے ذہن تبدیل کر کے اپنے ساتھ کام کرنے کی ترغیب دیتے ہیں ۔ حساس اداروں کی جانب سے اس قسم کی سرگرمیوں میں ملوث اساتذہ اور طلباکی فہرست تیار کر لی گئی ہے اور اب ان کی نگرانی بھی کی جا رہی ہے ۔ حساس اداروں کے ذرائع کا کہنا ہے کہ نگرانی مکمل ہونے پر ان اساتذہ اور طلباکے خلاف آپریشن کیا جائے گا اور انہیں قانون کے کٹہرے میں بھی لایا جائے گا۔