کراچی(نیوزڈیسک) ایم کیو ایم کے تنظیمی شعبہ جات کے ارکان سے ٹیلی فونک خطاب کرتے ہوئے الطاف حسین نے وزیراعلیٰ سندھ سید قائم علی شاہ اور سندھ اسمبلی کے تمام ارکان سے کہا ہے کہ وہ یا تو سندھ کو دھرتی ماں کہنا چھوڑ دیں اور اگر وہ سندھ کو دھرتی ماں سمجھتے ہیں تو وہ مل کر یہ بل پاس کریں کہ اب ہمیں شاہ لطیف کی امن اور پیارکرنے والوں کی سندھ کی دھرتی پر مظلوموں پر ظلم کرنے والی رینجرز نہیں چاہیے۔ الطاف حسین نے کہا کہ رینجرز نے اپنی پریس ریلیز میں اس بات کا اعلان کیا کہ ایم کیو ایم کے سیکٹر اور یونٹ انچارج کو گرفتار کریںگے۔ رینجرز کے اس اعلان پر نہ تو وزیراعلیٰ نے اور نہ ہی عدلیہ نے کوئی نوٹس لیا ہے۔ الطاف حسین نے کہا کہ رینجرز کی جانب سے ریاستی مظالم، گرفتاریوں، تشدد اور ماورائے عدالت قتل کے خلاف ہم وزیراعلیٰ ہائوس کے سامنے پرامن احتجاجی دھرنا دیںگے۔ رابطہ کمیٹی جلد ہی اس دھرنے کی تاریخ کا اعلان کرے گی