ملتان(نیوزڈیسک) ملتان میں مسلم لیگ (ن) کے کارکن کے گھر میڈیا سے گفتگو کرتے ہوئے عابد شیر علی کا کہنا تھا کہ وزیراعظم نواز شریف کی سوچ تعمیری جبکہ عمران خان کی سوچ تخریبی ہے۔ عمران خان جوڈیشل کمیشن میں ثبوت پیش نہیں کر سکے یہی وجہ ہے کہ کمیشن کے فیصلے کے بعد انہیں منہ چھپانا پڑے گا۔ وفاقی وزیر مملکت نے کہا کہ سندھ میں گورنر راج کا امکان نہیں تاہم سندھ کا امن تباہ کرنے والوں کو کسی صورت نہیں چھوڑیں گے۔ بھارتی خفیہ ایجنسی ” را” کی مداخلت ملکی سالمیت پر حملہ ہے جس پر جلد وزیر داخلہ بریفنگ دیں گے۔ عابد شیر علی کا کہنا تھا کہ سحر اور افطار میں لوڈشیڈنگ ختم کر دی ہے۔ 93 نئے گرڈ سٹیشن لگائے جائیں گے جبکہ 1100 کلومیٹر کی نئی ٹرانسمیشن لائن کی تنصیب کا کام بھی جاری ہے۔