اسلام آباد(نیوز ڈیسک) تربت میں ایف ڈبلیو او کے قافلے پر ریموٹ کنٹرول بم سے حملہ کیا گیا ، دھماکے کے نتیجے میں تین اہلکار زخمی ہوگئے ، گاڑی کو بھی نقصان پہنچا۔ تفصیلات کے مطابق تربت میں چوہان کراس کے علاقے میں مین روڈ پر نامعلوم افراد نے سڑک کنارے دیسی ساختہ بم نصب کر رکھا تھا۔ ایف ڈبلیو او کی گاڑیوں کا قافلہ وہاں سے گزرا تو اسے ریموٹ کنٹرول سے اڑا دیا گیا۔ زوردار دھماکے کے باعث گاڑی میں سوار تین اہلکار زخمی ہوگئے جنہیں تربت ہسپتال منتقل کر دیا گیا۔ دھماکے کے نتیجے میں گاڑی کو بھی نقصان پہنچا ، دھماکے کی اطلاع ملتے ہی ایف سی ، پولیس اور لیویز کی نفری نے موقع پر پہنچ کر شواہد اکھٹے کئے اور علاقے کو گھیرے میں لیکر ملزموں کی تلاش شروع کر دی ہے۔